У насычанай праграме юбілейных урачыстасцей, што прайшлі ў ГДУ, было шмат цікавых святочных мерапрыемстваў. Адным з іх стала адкрыццё музейнай экспазіцыі, прысвечанай гісторыі нашай вну. Гэтая сапраўды знамянальная падзея сабрала кіраўніцтва, выкладчыкаў, супрацоўнікаў універсітэта, якія атрымалі магчымасць яшчэ раз пераканацца ў тым, наколькі змястоўным было жыццё вядучай вышэйшай навучальнай установы Беларускага Палесся на працягу ўсіх гадоў яе існавання, колькі знакамітых імёнаў, важных падзей назаўсёды ўпісана ў яе слаўны летапіс.

Больш чым 300 каштоўных экспанатаў, якія ўвайшлі ў музейную экспазіцыю, распавядаюць аб знакавых этапах развіцця вну, пачынаючы з першых гадоў яе станаўлення і завяршаючы сучасным станам. Сярод іх - архіўныя дакументы, фотаздымкі, навуковыя працы і асабістыя рэчы вучоных, чые прафесійныя і чалавечыя лёсы непарыўна звязаны з нашай навучальнай установай, дыпломы, граматы, медалі, якія засведчылі яе вялікі ўнёсак у важную справу развіцця ў Беларусі навукі, вышэйшай адукацыі, культуры і спорту.

Настольная лямпа рэктара Б.В. Бокуця, першы нумар газеты "Гомельскі універсітэт", сапраўды рарытэтныя кнігі з бібліятэкі ГДУ імя Ф. Скарыны, выдадзеныя ў канцы XIX - пачатку XX стагоддзя, паштовыя канверты з лагатыпам "ГДУ", выпушчаныя ў 1988 годзе, цікавыя фотаздымкі, на якіх адлюстравана будаўніцтва студэнцкага інтэрната № 1 па вул. П. Броўкі, літаратурныя выданні вядомых беларускіх пісьменнікаў В. Быкава, І. Мележа, І. Навуменкі з аўтографамі аўтараў, - гэтыя і іншыя цікавыя экспанаты зрабілі экспазіцыю сапраўды жывой і змястоўнай.

Асаблівую ўвагу яе стваральнікі, у тым ліку загадчык музея-лабараторыі Ф. Скарыны Канстанцін Усовіч, надалі тым асобам, хто сваёй плённай працай заклаў трывалы падмурак, на якім зараз трымаецца універсітэт, а таксама іх не менш адказным і адданым сваёй справе пераемнікам. Так, асобныя тэматычныя раздзелы экспазіцыі прысвечаны рэктарам нашай вну, яе вядомым вучоным, лаўрэатам дзяржаўных прэмій, знакамітым выпускнікам універсітэта. У гэтым ганаровым спісе знаходзяцца У.А. Белы, Б.В. Бокуць, М.Ф. Лозбень, Л.А. Шамяткоў, М.В. Селькін, І.Ф. Харламаў, А.У. Рагачоў, , В.В. Валетаў, С.Дз. Бадруноў, кіраўнікі ГДУ і структурных падраздзяленняў універсітэта на сучасным этапе і інш. А сярод апошніх экспанатаў, што трапілі ў экспазіцыю, - зборнік навуковых прац вучоных-гісторыкаў, які быў выдадзены да 20-годдзя гістарычнага факультэта.